Тӏема шерашка бӏухошта гӏо деш хинна Магӏалбикера 90 шу даьнна яхархо даькъалайийцар Россе Президента
90 шу дизар укх деношка Магӏалбике яхача, тӏема шерашка бӏухошта гӏо деш лаьттача Есиева Шахбота Мовлатхана. Доккха цӏай хилар цох из йовзш, лоархӏаш мел барашта. Россе Президентагара Путин Владимиргара каьхат дӏаделар йоккхача сага. Президента цу тӏа белгалдаьд, Мовлатхана тӏема шерашка гойта денал мах, хам баь варгвоацарех долга.
«Магӏалбикерча администраце болхлой баьхкар из даькъалаювца. Шахьара администраце кулгалхо волча Галай Мусас тӏадилла, 90 шу даьннача Мовлатхана дог безамеча дешашца ураоттадеш къамаьл дийца, сомий тускар делар цар. Иразе, беркатаца, могаш-маьрша йолаш, яха даькъалайийцар из хьаьшаша», - йоах «Сердалога» бенача хоамо.
Белгалде деза, боккхача наьха дегаш хьастар, дукха халонаш тохкаш хьабаьхкача царна баркал алар вайна массанена лоархӏаме долга.
