«Дошо Гӏала» яхача кинокхетачен дехараш хьаэцаргда Гӏалгӏай мехка, ардара бетта 10-ча денга кхаччалца
«Дошо Гӏала» яхача Хӏӏ-ча Халкъашта юкъерча кинофестивале дакъа лаца ловрашкара дехараш хьаэцар чакхдала кхо ди дисад, уж ардара бетта 10-ча денга кхаччалца мара эцаргдац. Кинокхетаче дӏахьоргья Гӏалгӏай мехка ардара бетта 25-28 деношка.
Карарча шера дӏахьош йолча яхьа программан ийс дакъа да, цо чулоац дукха кинематографе жанраш, цу юкъе ловзарий, документальни, анимаце фильмаш да. Проекте дакъа лацар дика таро луш да кино хьакхолларашта - из да шоай картина профессиональни жюрена гойта йиш хиларал совгӏа, из кердача кинохьежерашта гойта а, ше халкъашта юкъерча боараме вовзийта а таро хилар.
Цига хургба дерригача дунен тӏара начӏал дола кинематографисташ. Шоай дехараш хьадайтад Россе, Инде, Бразиле, Китая, Венесуэлан, Кубан, Ирана, Турце, Узбекистана кинематографисташа. Хӏанз тӏехьарча деношка царна тӏакхийтар Германера, Индонезера, Казахстанера, Белорусь Республикера, Таджикистанера керда балхаш.
