«Цаӏ йола Росси» партеца цхьана болх дӏахьоргба мехкарча профцхьанкхетаро
Цхьана болх дӏабахьара тӏехьа бувзам чӏоагӏбир «Цаӏ йола Росси» яхача парте, «Гӏалгӏай республикерча профсоюзий цхьанкхетар» яхача моттиго. Оттабаьча бартчӏоагӏонца керттердар да бахархой вахара-къахьегама оагӏонцара бокъонаш лораяр, моттигера, федеральни бокъонаш тоаеш йоаржаяр, иштта шаккха оагӏон программацарча каьхаташка гӏолла болх дӏабахьар.
Мехкарча Профъоагӏонна кулгал деча Оздой Хаде, «Цаӏ йолча Россе» республикерча комитета хьалха латтача Кхоартой Ибрахӏима белгалдир цхьана болх дӏахьош кхоачашде дезараш, эггара хьалхарча оагӏонца теркалде деза керттера декхараш.
Профъоагӏон доакъашхой депутатий мугӏарашта, Паччахьалкхен Думанна юкъебахьарах, лакхерча бокъоний моттигага гӏолла къахьегарий гӏулакх тоадарах дийцар кхетаче. Шаккха оагӏоно къахьегарах, «Къаман программага 2.0» гӏолла болх тоабе аьттув хургба Профъоагӏон. Парте каьхаташка белгалдолаш хургда къахьегачар гӏулакхаш. Республикера цу оагӏонцара болх дикка тоабара тӏехьа дакъа лоацаш хургья парти. Иштта лоархӏамедарех да, хоржамий кампанешка профъоагӏон хьинардараша дакъа лаца йиш хилар, СМИ оагӏонца цар болх дикка боаржабеш хургда из.
«Къахьегаш болча наьха бокъонаш лораяра тӏехьа лоархӏаме бартчӏоагӏам ба тахан оттабаьр. Бокъонашца дувзаденнараш хьаллаца, юкъарлон оагӏонца хеташдар теркалде аьттув хургба тха ишттача наькъаца», - белгалдир Оздой Хаде.
