Малара дагахьа волаш, машин лехкаш шозлагӏа гучаваьнначун гӏулакх судага кхаьчад
13.08.2026 16:51
Россе УК 1-ча даькъа 264.1 ст.бехктокхаме озаш ва мехкахо Наьсарен кхален полице болхлоша. Корта бохабеча маларах волаш, машин хехкаш лелаш гучаваьннав из саг. Белгалде деза, цу хьале волаш из ӏаьдало дӏалацар хӏанз шозлагӏа нийсденнилга.
«Корта бохабу малар менна, машин хехкаш лелаш хьалхагӏа ше бехктокхаме эза хиларах кхоачам хиланзар цу сага. Машин хехка бокъо йолаш вацар из. Бакъда укх шерарча ахкан хьалхарча бетта юха а зийра из полице, корта бохабеча маларах волаш, «Мерседес-Бенц Е 320» машинаца наькъ тӏа ваьнна лелаш. Бурокӏалха соцавир из Россе Наьсарен кхален ОМВД ДПС ОГИБДД болхлоша», - йоах «Сердалога» мехкарча прокуратурера бенача хоамо.
Магаса кхален суде хьалчудахьийтад из гӏулакх прокурора. Укх деношка дувцаргда из цига.
