Мехкарча промышленни пхьоалленашта ахча дала тарлуш да
05.06.2026 11:01
Эшаш дола гӏирсаш эца ахча лургда вай мехкарча къахьегама промышленни моттигашта. Из хоам «Сердалога» бир мехка Кабмине.
«Укх бетта 8-ча денгара 17-ча денга кхаччалца, субсидей дехараш чуэцаш хургба мехкарча промышленноста, таьрахьашца дувзаденнарех йолча министерстве», - йоах тхога бенача хоамо.
Из ахча хьожадеш да Россе арахийца долча РФ Минпромторга реестра юкъедихьача гӏирсашта (№719 йолаш яьча чӏоагӏонца). Цу юкъе я компьютерни техника, электороника, иштта машинашта эшаш дола гӏирсаш (классаш 26-28 ОКПД 2).
Промышленни оагӏонцара моттигаш боаггӏача боараме болх дӏахьош хургйолаш деш да из деррига.
