Мохк бовзаш, гӏаш никъ бечар Ерригача Россе яхьашка котало яьккхар вай республико
«Кагирхойи, бераши» яхача къаман проекта «Леларал а доккхагӏа» яхача программан Ерригача Россе яхьашка котало яьккхар кагирхой гӏулакхех йолча вай мехкарча Комитетj. Из хоам «Сердалога» бир КДМ болхло йолча Гӏулой Аминас.
«Къонабарий ха» яхача Ерригача Россе премега гӏолла дӏайихьар из кхетаче. «Туристически слёта мохк» яхача оагӏонца котало яьккхар вай республико. 2026-ча шера Жӏайрахьа кхале «БЕЙНИ-2026» яха туристически слет дӏаяхьа бокъо луш да из гӏулакх. Шу даьнначул тӏехьагӏа массанена езаенна кхетаче юха дийнъергья хьинардараша», - дийцар тха газетага. Вай республике туризм дикка йоаржаяра тӏагӏолла кхаьча котало я из. Ер шу доладелча денз 120 эзар совгӏа турист ва вай мехка хиннараш.
«Туризм, хьаьша тӏаэцара гӏулакх» яхача къаман проектага гӏолла дӏахьош болча балхо дикка пайда боаржабаьб ала йиш я тахан. «Кагирхой гӏулакхех йола комитет хиларга хьежжа, тхона чӏоагӏа лоархӏаме да Россе моттигашка гӏолла го баха аьттув хилийтар, цу оагӏонца дувзаденнараш тоадар. Доаккхал ду оаха цу коталонах! «Бейни-2026» дӏаяхьа кийчо еш да тхо, цхьана къахьегаш, лакхача боараме чакхдоаккхаргда вай из гӏулакх, Дала аьннадале», - дийцар тха газетага кагирхой гӏулакхех йолча Комитета хьалха латташ волча Малсаганаькъан Адама. Геттара лоархӏаме совгӏат хеташ вар из шоашта деннача коталон дипломах.
