Смоленске дӏахьоча Ерригроссийски семинара доакъашхо я Гӏалгӏай Республика
Гӏалгӏай Республикан кагирхой гӏулакхех йолча Комитета кулгалхочо Пхьошанаькъан Зоврбика, иштта «Хьалхарчар болам» яхача моттигерча даькъа кулгалхочун гӏончас Чоренаькъан Ювсапа дакъа лаьцар Смоленске дӏахьош хиннача кагирхой хаттараш дувцача Ерригроссийски семинаре-кхетаче, яхаш, дийцар республикан кагирхой боахаме.
«Кхаь дийнахьа, Россия-2026 яхача Кагирхой столице хьаьший хилар керттерча сессешка дакъа лоацаш, цига дийцар «Кагирхойи бераши» яха къаман проект кхоачашъярах, кагирхой оагӏув, уж нийсача наькъ тӏа хиларах, царна Даьхенцара безам совбоаккхаш кхетам баларах. Кхетаче вӏашагӏъеллар Роскагирхоша, Смоленски областа Паччахьалкхено. Цига гулвелар цхьан майдан тӏа 200 федеральни кхелахо, берригача мехкара цунна чудоагӏача боахамий кулгалхой», - аьлар хоамо.
Из кхетаче хьаеллаш белгалдир, Лаьрххӏача тӏема операце ветеранаш хьаллацар, мукъадаьхача доазонаш тӏа бахача кагирхошца болх бар керттера дош хилар.
«Цу тайпарча кхетаченашка дакъа лоацаш хиларо таро лу федеральни хьашташ довза, иштта моттигашкара дикагӏдар хьаэца. Къаьстта лоархӏаме да тахан къамашта юкъерча цхьоагӏон хаттар, къона дезал хьаллацар, кагирхошта дика кхетам балар хьалхарча аргӏагӏа латташ хилар. Тха декхар да республикан хӏара саг ший таронаш кхоачашъе йиш йолаш хургвола хьалаш хьакхоллар», - аьлар Пхьошанаькъан Зоврбика.
