ЕГЭца дувзаденнараша хьагойт, дешара оагӏонцара хӏама мехка тоалуш латтилга
Цаӏ йола паччахьалкхен экзамен дӏалуш хиннача 21 сага укх шера 100 балл яьккхар. Керттерча предметех бола болх дикача оагӏорахьа хувцабеннилга гуш да тахан. Ши эзар совгӏа бола къонабараш дика чакхбаьннаб ала йиш йолаш да вай. Вай дешара оагӏонца чӏоагӏа лоархӏаме дола хувцамаш да уж.
«ЕГЭ дакъа лоацаш хиннараш 3827 саг вар. Итт моттиг яр экзаменаш дӏаяла кийчъяьраш, иштта цхьацца бахьанех ЕГЭ цӏагӏа дӏалуш хиннарашта кхо моттиг кийчъяьяр. Дӏадахача шерца нийсдича, укх шера дуккха дикагӏа дар эрсий меттах, математиках, физиках, биологех, географех, ингалсий меттах, информатиках, обществознанех экзаменаш дӏаялара гӏулакх. Цул совгӏа, физика хержа хиннараш а укх шера дукхагӏа бар, хӏаьта из чӏоагӏа лоархӏаме да инженерни, технически оагӏонашца говзанчаш кийчбара тӏехьа.
Экзамен дӏаялара болх боаггӏача боараме, цхьаккха совлен хӏама, кхоачамбоацараш юкъе доацаш хургболаш къахьийгар мехка. 1200 гарга болхлой бар цу гӏулакха тӏахьожам бе кийчбаьраш, цу юкъе бар берий даьй-ноаной.
Дӏадахача шерга хьежача, укх шера цу оагӏонцара гӏалаташ кӏезигагӏа дар», - дийцар «Сердалога» министерствон болхлоша. Дешара оагӏонцара гӏулакхаш, хоалуш, меттадоагӏаш латт мехка. Таханарча вай кагирхоша хьагойтад, республике начӏал дола, тайп-тайпара говзал караерзае хьинар, низ бола къонабараш ураоттабара тӏехьа къахьегаш болга. Боккхача мехка толашагӏа йолча вузашка дешаргдола, кхоана къаман накъабаргбола нах ба уж.
