Бахархоша йоал ханнахьа дӏатергйолаш; къахьегаш ба Россетий, Паччахьалкхен болхлой

«Къилбаседа Кавказа Россеташ» яхача оагӏонна карарча хана дӏатакха дезаш тӏалатта декхар, лайчилла бетта 1-ча денга кхаччалца йола ха хьаийцача, - 182,4 млн сом ахча да. 162,9 млн ахча цу юкъера дӏадахача шерашкара да.

Тӏалатташ дола декхар бахархоша боаггӏача боараме дӏатергдолаш, кхоачашде дезарех дийцар Паччахьалкхен хьалха латтача Сластенин Владимира кулгал деш дӏайихьача аргӏанарча кхетаче. Цига дакъа лоацаш вар «Къилбаседа Кавказа Россеташ» яхача оагӏон паччахьалкхен моттигашца бувзам лелабарах йолча моттига кулгалхочун гӏонча вола Поляков Сергей, энергетиках йолча министерствон, ЖКХ кулгал деш вола Султиганаькъан ӏумар, «Къилбаседа Кавказа Россеташ» - «Ингушэнерго» филиала кулгалхо Котаганаькъан Кемран.

Кхетаче белгалдир, моттигерча рузкъах болх беш йолча моттигаша декхар хьателар дикка лохагӏа латтилга: укх шерарча 10 бетта шоашта лоаттаяьча токах доагӏар 40%-га кхоачаш мара хьаденнадац цар. Лайчилла бетта 1-ча денга кхаччалца йола ха хьаийцача, карарча хана тӏалатта декхар 723 млн сом да.

«Тӏалатташ дола декхар ханнахьа дӏатокхаш цахиларо тока оагӏонцарча моттигий болх боаггӏача боараме дӏабахийтац. Из гӏулакх тоадара тӏехьа кхетаченаш дӏакхухьаш, кердадараш юкъедоаладеш къахьега деза. Боаггӏача боараме из болх хьаоттабича хоалуш меттадоагӏаргда цу оагӏонца дувзаденнараш», - белгалдир кхетаче «Къилбаседа Кавказа Россеташ» яхача моттига кулгалхочун гӏонча волча Поляков Сергейс.

«Ток лоаттаеш йолча моттигашкара ӏан кийчо еш дӏадихьа балхаш тӏалатташ доккхий декхараш долаш кхоачашдаьд. Вайна массанена дика ховш, кхетадеш да, йоагаеча токах дола декхар ханнахьа дӏалуш цахиларо боаггӏача боараме токацара болх дӏа ца бохьийталга, - аьлар Котаганаькъан Кемрана. – Бахархоша ахча дӏателаш дола гӏулакх лерттӏа леладергдолаш къахьега деза вай тахан».

Из болх дикагӏа дӏагӏоргболаш, цхьана цхьацца проекташ йоаржаярах дийцар кхетаче гулбеннараша.