Россеташ массайолча оагӏорахьара тоадара балхаш деш я токаца
«Къилбаседа-Кавказ Россеташ»- «Ингушэнерго» еррига балха оагӏонаш чулоацаш, тока саьргашта (ЛЭП) 0,4 кВ ремонт еш латт Шолжа-Шахьара керда нах баха ӏохайшача моттиге.
Тока йӏоахал - цхьа километр я. Энергообъект хьалъяьй бахархоша шоаш, из 2024 шера энергокомпане тӏаийцар. Цхьа бахьан шоашта хьанийсденнача гӏирсашца, дика токах къайлабаьккха боацача саьрга гӏирса хьалхашка латта декхар кхоачам болаш дӏахьош дацар: цун низ 120 Вольт мара бацар. Цул совгӏа, цу даькъ тӏа каст-каста саьргаш вӏашагӏхьекхалуш моттигаш а нийслора.
Проект кхоачашъеш, 24 керда аьшкабетона бӏоагӏий оттадергда, иштта тока саьргаш дӏахьоргда цхьа километр (СИП). СИП геттара чӏоагӏа саьрг ба, из кхераме бац лотабалара, е шоайла саьргаш вӏашагӏкхетара, е ара шелал эттаяр аьнна гӏорабеш а бац.
Цул совгӏа, цу тайпара болх дӏабахьаро лоха ток хилара дола хаттар кхоачашдергда, иштта токаца кхерамзле лораергья Заовражни, Пхьарагӏолганаькъан, Пхьугой урамашка дахача 30 цӏенна. Хӏаьта цо таро лургья тешшаме дикал йола ток лоаттае кердача цӏеношта.
«Керттера болх баь баьннаб. Тӏеххьара балха дакъа - керда цӏенош юкъедахара е езаш йола монтаж я, говзанчаша из болх а дикагӏа тока саьрг бохийташ бергба. Хьатӏадоагӏа кӏира чакхдоалаш, цу даькъ тӏа бахача наха зувргда доккхий хувцамаш, ток лоаттаяра балха даькъ тӏа: хьалха я сийрда, тешшаме сердал», - аьлар Шолжа кхален тока бувзама филиала керттерча инженера Осканаькъан Мухьмада.
