Цӏи ялара кхерамеча ханага кийчо еш я «Къилбаседа Кавказа Россеташ»
Геттара дӏайха денош оттарга кийчо еш, тока моттигашка болх дӏахьош ба тахан «КъилбаседаКавказа Россетий» - «Ингушэнерго» филиала къахьегамхой.
Мехкарча 23 гектарага кхоачаш долча доазон тӏа тока линеш йолха наькъаш цӏендеш, тока саьргашта новкъарле еш йола гаьнаш дӏатедаш къахьийгад цига. Тока моттигашта юхе лакха йӏовхал латтача хана цӏи ялар кхерам боландаь, кхоачашдеш да из деррига хан-ханнахьа. Иштта тока линеш йолхача моттигашка тохкам беш, трансформаторашка, цӏера духьала эшаш болча кхоачама хьалага хьожаш ба мехка.
«Геттара дӏайха денош латтача хана, тока моттигашта тӏалатташ бола низ айлу, цудухьа хӏара денна терко е езаш да из гӏулакх. Йӏовхал латта денош чакхдаллалца дӏабахьа беза болх ба из. Цу юкъе да тока линешка, подстанцешка хьежар, МЧС болхлошца, муниципалитеташца, хаоттама гӏулакх белгалдеш болча болхлошца даиман бувзаме хилар», - дийцар тха газетага «Ингушэнерго» филиала хьалха латтача Котаганаькъан Кимрана.
«Къилбаседа Кавказа Россетий» болхлоша бахархошка кхайкарал ду йӏовхал латтача хана къаьстта чӏоагӏа фийла хила яхаш! Тока моттигашта юхе ма хила, ӏаьдало лорадеш долча ток йолча доазон тӏа цӏи ювза, лотаярал кхерам бола хӏама, доагор дита, нувхаш лоаттае йиш яц! Моллагӏа тешаме ца хета хӏама оашош зийча, ӏалаьмате чехка телефон тоха укх номерах: 8-800-220-0-220 (телефон тохар мах боацаш да)) – оператораш 24 сахьата болх беш ба.
