Лоамашкарча курорта тока оагӏонцара хьал лакхача боарам тӏа доаккхаш ба «Россетий» моттигера болхлой
Жӏайрахьа кхале уллача «ӏарамхи» курорта тока оагӏонцара хьал лакхача боараме хургдар де гӏерт, «Къилбаседа Кавказа Россеташ» яхача филиала болхлой. Цу моттигерча тока оагӏонца боккха болх боаржабаь боахк уж тахан.
Цул совгӏа, 10 Кв низ бола из моттиг ӏарамхи яхача ах юрта, амбулоторена, почтанна, бувзама моттигашта ток лоаттаеш я. Тока бӏоагӏаш тӏара тишденнача «пелашта» меттал 50 кердадараш дӏаоттадергда болхлоша, иштта 4,5 км къаьнарча тока саьрга меттел, толашагӏа бола СИП бохийтаргба. СИП, Россе хьабаь, моллагӏча хаоттама духьалъотталуш; мух хьекхаш, саьргаш дӏа-хьа теркадеш хилча, талхаш цахилара дика лоархӏаш, кхераме боацаш ба.
«Гӏалгӏай мехка туризм йоаржаяр тахан лоархӏамеча гӏулакхех да, хӏаьта цу оагӏонца башха моттиг дӏалоацаш да тока хьал лертӏа хилар. Россетий болхлоша шоашта могар ду, ма хулла кхоачамбоацараш юстардоахаш», - белгалдир «Къилбаседа Кавказа Россетий» - «Ингушэнерго» филиала хьалха латтача Котаганаькъан Кимрана.
2026-ча шера «Ингушэнерго» филиала тока оагӏонцара моттигаш меттайоалаеш болх ба цу программаца дӏахьор. Ер кӏира чакхдалале, болх чакхбаккха лерхӏ къахьегамхоша.
