2026-ча шера 927 тока бӏоагӏах бокъо йоацаш дӏахоттабалар гучадаьккхар Россеташа
2026-ча шера дӏабихьача балхаца мехкарча 927 тока бӏоагӏах (ЛЭП) бокъо йоацаш (ВОЛС) тока саьргаш дӏатайса хилар гучадаьккхар «Къилбаседа Кавказа Россеташа»- «Ингушэнерго» филиала болхлоша. Кхоачамбоацараш гучадаьхача моттигех я Илдарха-Гӏала, Дола-Коа, Инаркъе, Йоккха Ачалкхе.
Бокъо йоацаш бахархоша шоашта ловчча тайпара ЛЭП бӏоагӏех ВОЛС дӏахоттар тока оагӏонцара хьал воча доаккхаш да. Цул совгӏа, хан-ханнахьа шоай болх дӏахьош, тока моттигашка кулг тохаш къахьега дезача цу оагӏонцарча болхлошта а йоккха хало хулаш хӏама да из.
Кхерамзлен хьал лорадеш боацаш, иштта бола болх токаца лелабераша доккха хатар доаржаде тарлуш да. Моллагӏа болх дӏабахьа безаш хилча, цу оагӏонцара болхлой хьабеха беза.
Телефон дӏатеха, моллагӏа хӏама тахка йиш йола номер: 8-800-220-0-220, бахархой тӏаийбеча офисе е «Къилбаседа Кавказа Россеташ» яхача керттерча сайта тӏа.
