Гаьгенаькъан Руслана вӏашагӏкхетар хилар, Гӏалгӏайчен избиркома кулгалхочунца
Гӏалгӏайчен Халкъа Гуллама кулгалхочун кхетаче хилар республикан Хоржамий комиссе кулгалхочунца Йовлой Мусайца. Цига иштта дакъа лоацаш бар паччахьалкхен гӏишлон, законодательства комитета кулгалхо Чернышева Юлия, Парламента Аппарата кулгалхо Гаьгенаькъан Башир, цун гӏонча Горчхананаькъан Муса.
Доакъашхоша дийцар Гӏалгӏай Республикан Хоржамий комисси вӏашагӏйоллара хаттар. Кердача комиссе тоаба вӏашагӏйолларгья «Российски Федераце бахархой референдуме дакъа лацара бокъон керттера тешам баларах» долча федеральни законага, иштта «Гӏалгӏай Республикан хоржамий комиссе» республикан законага хьежжа.
Комиссена чувоагӏаш хургва 12 доакъашхо. Царех ялх хьожаву республикан Кулгалхочо, кхы а ялх - Халкъа Гулламо.
Уж хоржаргба Паччахьалкхен Думе, Гӏалгӏайчен Халкъа Гулламе, кхыча партешка, юкъарлон цхьанкхетарашка мандаташ дӏа-юха декъара юкъебахабале, политически партеш могадечун ларда тӏа. Иштта дӏалоархӏаргда доал деча даькъ тӏарча ӏаьдала викалаша, хьалхагӏа хиннача тоабо, Россе Керттерча хоржамий комисссе могадеш дар.
Кандидатурах йола предложенеш дӏайохьийтаргья Гӏалгӏайчен Кулгалхочунга е Халкъа Гулламе. Кандидаташ хила бех №67-ФЗ федеральни закона 29 статьяс дӏадеххача беса. Из могадеш йолча парте, юкъарлон цхьанкхетара бокъонаш каьхаташца чӏоагӏъе еза.
Кхетачен чаккхе еш, Гаьгенаькъан Руслана тӏадиллар уж хаттараш чудоагӏача моттигашта, комиссси вӏашагӏйоллара болх дӏаболабар.
