«Къел айп дац» яхача спектаклага хьажа бех мехкахой эрсий театро
Ерригача Росси дӏахьош болча «Дига хьай да- нана театре, музее, концерта зале» яхача болама бӏарччача дезалашца арабаьнна салаӏа аьттув лу наха. Из болам хьаллоацаш, « Къел айп дац» яхача Островске Н. А. комедех оттаяьча спектаклага хьажа бех бахархой мехкарча Эрсий паччахьалкхен ашарий - драматически театро.
Из хоам «Сердалога» театрера бир. «Деррига а мишта латт аьлча, къонача хьажархочо Пушкина картага гӏолла билет эц, хӏаьта из кассе дӏахьекхача; даьна, нанна билеташ нийсса ах маьхах лу - 50%. Цхьана арабаьнна, хоза ха дӏаяхьа аьттув хургба дезалий», - дийцар тхога. Укх беттарча 28-ча дийнахьа нийсса ялх сахьат сайранна даьлча гойтаргья спектакль. Дезала юкъера лоархӏамедараш, иштта кхыдола хӏамаш беламца гойташ да цу чу актёраша.
Белгалде деза, цӏагӏарча нахаца цхьана, иштта араваьнна, театре вахар дуккханеша хьаллоацаш хӏама долга.
