Наьсарен тоабо «Шахьарий къовсаме» дото совгӏат даьккхар
Наьсарен кагирхой тоабо дика толамаш даьхар «Шахьарий къовсам» яха ерригроссийски яхьаш дӏахьоча. Цар дото совгӏаташ даьхар, иштта 4 миллион сома сертификат а делар царна.
Лоархӏамегӏа дола къовсама дакъа дӏахьош дар Москве, лайчилла бетта 8-10 деношка. Цига вӏашагӏкхийтар мехка чӏоагӏагӏа бола 18 шерга кхаччалца ха яьнна спортсменаш. Уж котбаьлар Фрязинорча, Пермерча, Санкт-Петербургерча тобашцарча яхьашка, цига наьсархоша шоаш дикагӏчарна юкъе хилар гойтар. Вай спортсменаш иштта котбаьлар Краснодара тоабал, цар чот яр 13:11.
Яхьа керттера дакъа дӏахьош Наьсарен тоаба юха а латаш хилар Фрязинорча викалашца. Цига, шоашца яхьеяьннача тоабангахьа чот 13:9 йолаш котало а йолаш, вай спортсменаш шоллагӏча моттиге хилар.
Наьсарен сий доаккхаш, цига хилар Цӏечой Мухьмад, Саьпарӏаланаькъан Ӏаддал-Малик, Гӏазданаькъан Илез, Жандаранаькъан Рахьим, Осканаькъан Мухьмад, Арсанаькъан Мухьаммад, Мужахой Ислам, Эсамарзанаькъан Рамзан, Могушканаькъан Рамиль, Тӏоаршхой Абабукар, Беканаькъан Ӏаддал-Малик, Йовлой Мухьмад-Башир, Бештой Микаил, Пхьиленаькъан Рахьим.
Яхь дӏайихьар Россе дзюдо Федераце новкъосталца, иштта «Даьхен Ага» яхача дика гӏулакхаш леладеча программо хьаллоацаш. Проекта керттера маӏан - берий, кагирхой спорт дегӏайоалаяр, мехка тайп-тайпарча къонача латархой тоабаш чӏоагӏъяр.
