Ялх шу хьалха вай мехкарча Паччахьалкхенна керте эттар Сластенин Владимир
Сластенин Владимирах вай мехка премьер-министр хинна ялх шу дизар. «Сердалога» из хоам бу Мехкадаь зарбан болх лелабераша.
2020-ча шера наджгоанцхой бетта 27-ча дийнахьа вай Мехкадаь чӏоагӏонца мехкарча Паччахьалкхен кулгалхочун декхараш кхоачашде оттавир Сластенин Владимир, тушоли бетта 26-ча дийнахьа премьер- министралла хержар из.
«Вай мехка хьал тоадара тӏехьа доккха дакъа дӏалоацаш, къахьегаш ва тахан Сластенин Владимир са тоабан юкъе. Геттара хала ханаш латтача хана а, республиках дог лазаш, ший декхараш тӏехдика кхоачашде хьожаш из хиларах дуккха дикаш кхоачашде аьттув хилар вай», - белгалдир Келаматанаькъан Махьмуд-ӏаьлас Паччахьалкхен Кулгалхочун балхах дувцаш.
Тайп-тайпара лоархӏаме декхараш кхоачашдеш, республикера вахара-экономически хьал тоадарца дикка къахьегаш, шийна хьалхашкара декхараш боаггӏача боараме кхоачашде хьожаш, лакха говзал гойташ, хьавена саг ва Сластенин Владимир.
Тахан республикерча дуккхача хьакимаша белгалдеш да из. Министерствай, тайп-тайпарча моттигий болхлой тахан из даькъалвувцаш ба дег чура! Могаш, маьрша волаш,ираз долаш, мехка хьал тоадара тӏехьа хӏанз санна хьинаре, бехктокхаме къахьегаш дӏаваха аьттув хилба цун!
