МагӀалбикера урам воча хьале хиларах, СК уголовни гӀулакх хьадийллар
Тха газето укх деношка яздаьдар, МагӀалбик-Шахьара Тӏонганаькъан урам воча хьале хиларах. ГӏалгӀайчен Халкъа фронт юкъеярах, из хоам нахалбаьлар. Цунна теркам тӀабахийтар Россе Тохкама комитето а. Цунца дувзаденна уголовни гӀулакх хьадийллар.
«ГӏалгӀай Республикан Халкъа фронто кхайкарал даьчул тӀехьагӀа, из болх дӏахьош ба дӀахо. Россе тохкама комитето ший теркаме ийцар из. РФ тохкама комитета кулгалхочо Александр Иванович Бастрыкина тӀадиллар ГӏалгӀай Республике гӀолла йолча Россе СК СУ кулгалхочунна Асхабов Ахьмада из уголовни гӀулакх тахкар, хӀанз цу зуламах дола гӀулакх дӀадоладаьд», - аьлар «Сердало» газетага юкъарлон викалаша.
Белгалду, МагӀалбик-Шахьара Тӏонганаькъан урамах яхача цхьан кхалсага кхайкарал дир Халкъа фронтага, никъ беха хиларах.
Из хаттар каст-каста ийдеш дар хьалха а: никъ юкъера беха хиларах, дехьа-сехьа вала моттиг йоацаш, доккхий кӀоагаш доахкаш, халонаш озар наха. Цул совгӀа, газ чуюллаш яьккха сангар дӏакъовланза яр, лаьтта Ӏочу ца хьокхаш йитарах, никъ мелб бӏаьха кӀоаг хьахиннаб цига. Из кхераме да цига гӀолла лелача берашта, иштта боккхийча наха.
