«Фермерий ишкол» бахархошта лоархӏамедараш довзийташ я
«Фермерий ишкол» яха проект я, вай мехка дӏахьош. Из хоам «Сердалога» бир Мехкадаь зарбан болх лелабераша. «Юртбоахама хьал тоадар, фермерашта гӏо лоаттадар лоархӏамеча декхарех да тахан вай мехка. Цудухьа дӏахьош я вайцига «Фермерий ишкол» яха, цу оагӏонца къахьегарий кхетам лакхбеш, дуккхадараш довзийташ йола проект»,- белгалдир вай мехкадас Келаматанаькъан Махьмуд-ӏаьлас цу беркатеча гӏулакхах дувцаш.
Бӏаьстан шоллагӏча бетта дӏадоладергда дешар, кхаь бетта лаьрхӏа я проект. Фермера боахама доал дар мишта хила деза, цу балхаца эггара чӏоагӏагӏа лораде дезараш малагӏаш да дувцаргда цига. Шин шера цу проектага гӏолла дешаш дукха хӏама ӏомадаьд вай мехкарча 60 совгӏа фермера. Таханарча дийнахьа юртбоахаме хьинаре къахьегаш бола нах ба уж. Вай Мехкадас белгалдир, хӏанз дӏадоладеш дола дешар а иштта беркате хургхилар, Дала аьннадале. СВО доакъашхой, цар дезалаш, яхьашка дакъа ца лоацаш, чакхбала йиш йолаш ба цига деша.
