Дахкилганаькъан Шукречун вахара наькъах дийцар мехкарча дешархошта
Цӏихеза хиннача гӏалгӏай ӏилманхочун, хьехархочун, журналиста Дахкилганаькъан Шукречун 110 шу дизара хетаяь кхетаче хилар, Юкъерча Ачалкхерча культуран Цӏагӏа. «Дешархошта лаьрхӏа культура» яхача Ерригача Россе культуран-дешара проектага гӏолла дӏахьош болх бар из. Гӏалгӏай къаман цӏихеза хиннача виӏий вахара, кхоллама никъ бовзийтар цига берашта. Белгалде деза, иштта йолча кхетаченаша берашта боккха пайда белга, шоай къаман меттацара, исторецара безам чӏоагӏбелга.
«Дахкилганаькъан Шукре топоними, альпинизм, ономастика, этнографи тахка, дикка йовза ловш, иштта вай мехкарча шахьарий, XӏX-ча бӏаьшере гӏалгӏай-эрсий бувзама истори довза гӏерташ хиннав. Ший ӏилман балхашка, йоазошка дийцад цо царех лаьца. Россе историкашта юкъе дикка довзарех да цун « Гӏалгӏай тайпаш хьадалар», «Альпинизма исторецара», «Цхьаккха тайпара къовсаме хила йиш йоаца бакъдараш хьаллоацаш», «Даьхенах дола дош» яха балхаш», - дийцар «Сердалога» цу моттигера.
Гӏалгӏай ӏилманца, культуран оагӏонца йоккха моттиг дӏалоацаш ва из саг. Гӏалгӏай мотт тохкаш, фольклор гулъеш, кепа тохаш, иштта журналистике, хьехархо волаш къахьийгарех ва Дахкилганаькъан Шукре. Чӏоагӏа лоархӏаме да тахан цо мел кхеллар лингвисташта, историкашта, культурологашта, хӏаьта цун вахара никъ таханарча кагирхоша масал эца мегаргдарех хиннаб.
