ГӏалгӀайчен дешархошта дувц Ленинград лораеш лаьттача вай бӀухоех
ГӏалгӀайчен къам мехкахдаккхара дагалоаттама комплексе дӀахьош я лекцеш, уж хетаяьй Сийлахь-боккха Даьймехка тӀом лаьттача шерашка, гӀалгӀай бӀухошта карагӀдаьннача турпала гӀулакхашта. Цу тайпара аргӀанара кхетаче дӀайихьар МагӀалбика кхален цхьан ишколе. «ГӏалгӀайчен денал дола къонгаш - Ленинград лораяьраш» яха кхетачен тема тӀахьехаш я мехкахой денал, царна карагӀдаьннар диццадара, уж ба эггара бирсача тӀема шерашка, моастагӀчо го баь хинна шахьар мукъайоаккхаш духьаллаьттараш.
«Вай мехкахой беррига Сийлахь-боккха Даьймехка тӀом чакхбаллалца латаш хилар моастагӀчох. ГӏалгӀаша дакъа лаьцар турпала шахьар-Ленинград моастагӏчох мукъайоаккхаш. 100 саг совгӀа, вай зӀамигача республикера хилар, турпала денал гойташ Нева тӀа улла шахьар мукъайоаккхаш»,-аьлар «Сердало» газетага из кхетаче вӀашагӀъеллараша.
Ленинграда баь го - из эггара унзарагӏа а, турпалал гойташ а хинна вай мехка исторе оагӀув я. Дувца Ӏазап лаьттар 1941 шера тов бетта 8-ча дийнахьа дӀадоладенна 1944 шера наджгоанцхой бетта 27-ча денга кхаччалца. 872 денала, цхьоагӀон, турпала денош хиннад уж. Цу кхаь шера гаргга, шахьар йоаккхаш хиннача бӀухоша, бахархоша лайра шелал, моцал, даим чуетташ хинна дӏандаргаш, йоккхий топаш. Бакъда саг дӏааларах цатешшал чӀоагӀа лаьттача Ӏазапах, Ленинград дӀаяккха таро хиланзар.
Шахьар лораеш дакъа лоацаш хилар Советский Союза массайолча миӀингашкара бӀухой, цу юкъе бар гӏалгӀай а. Дукхача бӀухоша гойтар денал, турпалал Ленинграда тӏабодача наькъ тӀа, иштта шахьара чухьнахьа. Цар цӀераш, царна карагӀдаьннараш къаман юкъарча дагалоаттаме да даим, уж вай дӀадахьа деза тӀехьенга кхоачийташ.
