Наркомани яхача зуламах дийцар, Кердача Редантерча дешархошта
Кердача Редантерча культуран Цӏагӏа дӏайихьар наркомани яхача доккхача зулама духьале лоаттаярах йола кагирхошцара кхетаче.
«Наркоманена духьала къовсам лоаттабар тахан эггара лоархӏамегӏа долча гӏулакхех да. Къонабарашта хьалхадаха деза массахана, цу бӏехача, харцача хӏамах хьокхавенна саг ший ираз доадаьрех волга. Къаьстта йоккха терко лоаттае еза вай хӏетта кхийнарашта, хӏана аьлча цу воча хӏаман юкъе чуоза зуламхошта эггара аттагӏа бараш уж ба. Вай къаман юкъе из тайпара хӏама даржар дега боккха бохам беш да, цудухьа массане духьале е езаш, ма могга хоададаь дӏадаккха дезаш во да из. Иштта йола кхетаченаш къонабарашца дӏакхахьар тахан лоархӏамеча балхах да», - дийцар «Сердалога» культуран Цӏен кулгал деча Хоаной Марета.
Кхетаче кагирхошка дийцар, наркотик яхар унзара дохьаж долга, цкъа цу бӏехача хӏаманца хьакхаштаваьнначун дӏахойодача хана наха хьалхашка тешаме саг хинна дӏаотта хала хургдолга. Интернета оагӏонашка гӏолла къонабарий кхетам тувлбеш, цу бӏехача хӏаман юкъе уж чуоза гӏерташ багӏача зуламхошка цхьаккха тайпара ладувгӏа йиш йоацилга, моллагӏа тешаме доаца хӏама зийнадале, ма хулла сихагӏа ӏаьдалга хоам бе безилга хьалхадаьккхар кхетаче. Наркомани яхар сага дезале, вахаре эггара воккхагӏа вола моастагӏа хинна латтилга белгалдир гулбеннараша. Иштта йола кхетаченаш кагирхошца каст-каста дӏакхахьар юрташта, шахьарашта тӏадилла лоархӏаме декхар да. Вай дерригаш цхьана, ма могга духьале еш ца хуле, бӏеха хӏама хоададаь дӏадоаккхалургдац вайна. Хӏара цӏагӏа, массайолча дешара моттигашка дӏакхахьа безаш болх ба из.
