ИЗО Паччахьалкхен музее баха хилар ишкола дешархой
Гӏалгӏай паччахьалкхен музее гулбелар, Илдарха-Гӏалий тӏарча № 1 йолча ишкола дешархой. Къаман культураца дувзаденнараш довза чӏоагӏа чам чубенна дар бераш. Хӏаьта музея болхлоша тайп-тайпарча оагӏонашца дувзаденнараш довзийташ, экскурси йир царца.
«Пхьилекъонгий Луиза яр берашца болх дӏабихьар. Хьалхара шоашта гуш долча цхьаццадарех тамаш еш, дукха хаттараш телаш, дог айденна, массадар довза гӏерташ, яр къона тӏехье. Къаман истореца дувзаденнараш тахка чам болаш хул вай дешархой массахана, хӏаьта цу дийнахьа шоашта ма хетта ха дӏайихьар цар музее», - дийцар «Сердалога» цу моттига зарбан болх лелабераша.
Белгалде деза, иштта йола кхетаченаш дӏакхахьар чӏоагӏа лоархӏаме долга. Ураотташ латтача къонача тӏехьен шоай Даьхен истори, культура, къаман вахарера гӏулакхаш довзийтар тахан лоархӏаме да.
Доккха баркал аьлар дешархоша шоашца экскурси дӏахьош хиннача болхлошта. Къаман исторецара дукха хӏама дайзар царна цу дийнахьа.
