Лозаваьча сага хьалхара гӏо де ӏомабу вай мехкара дешархой
Вай мехкарча МЧС колледже дӏабихьар лозаваьча сага хьалхара гӏо мишта де деза гойта болх. Цига дакъа лоацаш бар Наьсарерча № 10 йолча ишколера, иштта Магасерча № 1, № 2 йолча ишколашкара дешархой. «Сердалога» тахан из хоам бера дешареи ӏилмани гӏулакхех йолча министерствера.
Берашта дӏагойтар лозаваьча сага лор хьатӏакхачале хьалхара гӏо дар мишта хила деза. Цул совгӏа, цу колледжа моттигаш йовзийташ экскурси йир берашца. Дешархошта довзийтар цӏерцарча гӏала, скалодрома, иштта кхыдарий гӏулакх, дийцар МЧС болх беш вола саг малагӏа тайпа кийчо яь хила веза.
Мехкарча дешареи ӏилмани гӏулакхех йолча Министерствон хьалха латтача Цхьорой Ахьмад-Башира ший къамаьла юкъе белгалдир, иштта бола болх къонабарашца дӏакхахьар лоархӏаме долга: «Моллагӏа дагадоаца хатар нийсденнача моттиге фу де деза, мишта хьовза беза ховш хилар чӏоагӏа лоархӏаме да.
Цу тайпарча моттиге нийсбелча, беха ца а хьовзаш, нийса гӏо де ховш хила беза къонабараш, тахан вай декхар да царна из хьалхадаккхар. Дог тийша ва со, цу гӏулакхах царна боккха пайда баргхиларах».
