Эбарга-Юртара дешархой духхьашха баха хилар Гӏалгӏайчен ИЗО музее
Эбарга-юртарча дешархошта искусство йовзийтар, гойтар сийрда йицлургйоаца цун оагӏув. Моттигерча №6 йолча юкъерча ишкола дешархой бахар Паччахьалкхен суртанчий музее. Из безаме, культура йовзийташ йола экскурси дӏаяхьа таро хилар «Дешархошта культура» яха федеральни программа хилар бахьан долаш, цо кхувш йоагӏача тӏехьенна новкъостал ду культуран тӏехьале йовза.
«Къонача хьаьшашта лаьрхӏа вӏашагӏъеллаяр музея залашка йоккха экскурси, из дӏахьош яр экскурсовод Пхьиленаькъан Луиза, искусство хьехаш йола Аькхенаькъан Хьава. Цига берашта дайзар гойта оттадаьча кхоллама балхех лаьца, цар исбахьален оагӏонаш йовзийтар, республикан культуран вахаре цар малагӏа дакъа дӏалоац хайра», - аьлар «Сердало» газетага Паччахьалкхен исбахьален искусствай музее.
Цигарча болхлоша берашта дийцар, исбахьаллен кхолламаш малагӏа лоархӏаме дакъа дӏалоацаш да исторически дагалоаттам лорабара, искусстве мишта лораду культуран белгало йола ӏадаташ, къаман оамалаш. Цо таро елар дешархошта кхетаде, хӏара искусствон балха тӏехьа лоархӏаме исторически ха латташ хилар, уж йовза а лорае а, дӏахо дӏаяхьа а езаш я.
