Доал доацача цискашта гӏо деш ба Магӏалбикера дешархой
Магӏалбикерча №18 йолча ишкола дешархоша «Дикала кӏопилг» яха болам боаржабир, доал доацаш ара лелача цискашта гӏо де дагахьа. Массадолча бераша барттайна хьаллаьцар из къахетаме гӏулакх. Хӏаравар цхьацца дакъа лаца хьежар цу юкъе цхьанне циский даарий тӏормиг бахьаш, кхычо консерваш, кхыбола кхача бахьаш. Мах баь варгвоацаш доккха дика да иштта доал доацаш ара шелал юаш лелача цу аькхилгий гӏулакхага хьажар, цар терко яр.
«Тхона дайра, ишколе къахьетаме дегаш дола бераш дукха долга. Гӏо де гӏерташ вар хӏаравар шийна могар даь», - дийцар «Сердалога» хьехархоша.
Кхувш латтарашта юкъе иштта дола хӏама доаржадар цар дегашка къахетам совбоаккхаш, Дала хьакхеллача хьайбашта терко яр адамашта тӏадилла декхар долга белгалдеш хул. Уж миска аькхилгаш доал доацаш дита йиш йоацалгах, царна гӏо де эттар чӏоагӏа лоархӏаме долга дувцаш, хьахозар бераша шоайла.
«Дикала кӏопилг» яхача боламо хьагойтар, дикаш де геттара доккхий хӏамаш ца эшилга, юххьанца шийна могар деш, зӏамига да аьнна юха ца кхеташ дӏаволавелча, Дала аьттув боаккх доккхача дикашка кхача а. Къаьстта ишколера из хӏама дӏадоладар геттара лоархӏаме да, хӏана аьлча, вахарера гӏулакхаш ӏомаду моттиг я из.
