Хоржамий балхаца дувзаденнараш довзийт Жӏайрахьа кхален дешархошта
24.02.2026 22:44
Хоржамашца дувзаденнараш довзийташ, болх дӏабихьар Жӏайрахьа кхален Олга тӏарча ишколе. Берашца кхетаче дӏаяхьа баьхкабар цу оагӏонцара болхлой.
«Жӏайрахьа кхалерча хоржамий кхела хьалха латтача ӏоахарганаькъан Б., № 105 йолча цу моттигерча хоржамий даькъ тӏарча кулгалхочо Кхузанаькъан Х., къонача хоржамхой Ди хьаллоацаш, къамаьл дир берашца.
Российски Федераце бокъонга диллача цу оагӏонца лораде дезарех, иштта лоархӏамедарех дийцар ураотташ латтача къонача тӏехьенга», - яхаш, хоам бу «Сердалога» Жӏайрахьа кхален администраце.
Цар белгалдир, хоржамашта юкъе дакъа лацар сага бокъо хиларал совгӏа, цун лоархӏаме декхар долга. Цу тайпарча кхетаченаша къонабарашта дикка пайда бу, хоржамашца дувзаденна гӏулакх довзийташ.
