Вай мехкарча бераца дувзаденнача гӏулакха ларах, тохкам дӏахьош ба СКР болхлой
Россе Тохкама Комитета кулгал деча Бастрыкин Александра вай мехкарча тохкама оагӏон болхлошта тӏадиллад, зӏамигача бера духьала низ беш долча гӏулакха ларах тохкам бийя, деррига шийга хьахайта, аьнна.
«Сердалога» из хоам бера мехкарча ӏаьдала болхлошкара. Укх бетта 20-ча дийнахьа яьржар интернета оагӏонашка, Тӏой-Юртарча цхьан сага доалахьарча берий беша зӏамигача бера духьала вӏалла хила йиш йоаца хӏама гойташ йола видео.
Берашца болх беш йолча цу чурча кхалсага массехказа кертах хӏама техай кӏаьнка. Мехкахой чӏоагӏа хьалхьоабаьб цу гӏулакхо. Берий беша тохкама болх дӏахьош ба тахан, мехкарча Тохкама оагӏон болхлой.
Моттигерча тохкамхошта хьалха латтача Асхабов Ахьмада тӏадиллад Бастрыкин Александра из гӏулакх ма дарра техке, деррига шийга хьахайта, аьнна. Россе Тохкама Комитете тӏахьожам беш ба тахан цу гӏулакха.
