Йоалацарча балхацара кхоачамбоацараш гучадаьхар мехкарча Тохкама оагӏон болхлоша
Йоалацарча балхаца цхьацца кхоачамбоацараш гучадаьнна, вай мехкара 33 шу даьнна коммерчески фирма кулгалхо суда хаьлхашка жоп дала оттаргва. Россе СК республикерча Тохкама оагӏон болхлоша къахьийгад цун гӏулакх ма дарра довзаш. РФ УК шин статьях бехктокхаме озаш ва из тахан. Дукхача хана денз ӏаьдала дӏаяла еза йоал дӏацаяларах, цу оагӏонцара гӏулакхаш къайладаха гӏерташ цхьацца бокъо йоаца болх лелабарах бехктокхаме озаргва из саг.
«Тохкама болхлоша тахан белгалдечох, 2018-ча шергара 2020-ча шерга кхаччалца, 42 млн сом ахчах дӏаяла езаш хинна йоал дӏацателар духьа, цу оагӏонцарча декларацена юкъе цхьацца хувцамаш даьд цо, бокъо йоацача тайпара. Цул совгӏа, 2023-ча шера, ше доал деча моттига йоалаца дувзаденна доккхий кхоачамбоацараш долга кхетадеш воллаше, тӏалатта декхар дӏа ца луш, 32 млн ахча къайладихьа, кхыча гӏулакхашта дӏадахийтад цо. Бокъо йоацаш цу саго кхестаяь базар бахьан долаш, паччахьалкхенна 42 млн сомага кхоачаш зе хиннад», - дийцар «Сердалога» ӏаьдала болхлоша.
Паччахьалкхенна хинна зе меттаоттадеш, ӏаьдало цу сага лелаеча базарах «эреста» яьй. Коммерчески моттига банка чота тӏа, иштта кулгалхочун чота тӏа хинна ахча а цхьаккха болх дӏабахьа йиш йоацаш соцадаьд ӏаьдало. Суде дӏахо тохкаш да из гӏулакх тахан.
