Гӏалгӏайчен СК тохкамхочо Магӏалбика кадеташта дийцар, «Никъ 31» яхача проектах
Гӏалгӏайче гӏолла йолча Россе СК тохкама урхаллено дӏахо ший болх дӏахьу, кхувш йоагӏача тӏехьенна зулам дала тарлу оагӏонаш юхатохаш бола хьехам беш. Цу комитета викалаша даим цу тайпара кхетаченаш дӏакхухьаш болх лелабу кагирхошца. Аргӏанара «Никъ 31» яха кхетам балара тематически болх дӏабихьар Магӏалбикерча №3 йолча юкъерча ишколе.
«Кхетаче дӏахьош Магӏалбик-Шахьара тохкама даькъа лоархӏаме гӏулакхаш тохкача болхлочо Могушканаькъан Ахьмада дешархошта дийцар, кхувш боагӏараш ӏехабеш, зуламашта юкъебоахаш хиларах. Къаьстта йола терко тӏаяхийтар, интернете гӏолла леладеча терроризма воча хӏамашта духьалъ-оттара хаттарашта. Тохкама урхаллен викала дийцар, кагирхой ӏехабеш хилара къамаьл мишта хул, малагӏча хаттарех лоравала веза, из хьал шоашта нийсделча фу де деза. Дӏахо цо белгалдир, терроризмаца дувзаденна гӏулакх леладераш уголовни бехктокхаме озаш хиларах. Иштта белгалдир атта ахча даккхара тӏехьа ца боалаш, цу даькъ тӏа во-дика къоастадеш хила безилга», - аьлар «Сердало» газетага Гӏалгӏайчен Тохкама комитете.
Цига дийцар шоайла дагабалара хьакъехьа дола къамаьл, берий таро хилар цу кхетаченах дукха пайда эца.
Иштта дӏахьош йолча кхетаченах бокъон культура лакхъе таро хул кхувш йоагӏача тӏехьен, цига дикагӏа ӏомаду интернете гӏолла латташ дола кхерамзлен хаттараш.
Гӏалгӏайчен тохкама комитете хьалхадаьккхар, «Никъ 31» яха проект го йиш хилар лаьрххӏача сайта тӏа: выход31.рф/.
