«Марем» яхача Магасерча гимназе хьехархошца кхетаче хилар мехкарча СКР болхлочун
Дешара шу хьатӏаоттарца, Магасерча «Марем» гимназе ваха, цигарча хьехархошца къамаьл деш хилар мехкарча СКР оагӏон болхло. Цига дийцар кхувш латта къона тӏехье зуламех, воча гӏулакхех лораярах. Къаьстта терко йир эпсара интернета оагӏонашка гӏолла хӏетта кхийнараш тувлбаь, ӏехабаь доккхача зулама юкъебига гӏерташ тийшаболх дӏахьош хилара.
«Дешара шу долалуча хана, кердадаха деза лоархӏаме хӏамаш да уж. Тайп-тайпарча бувзама оагӏонашка багӏача къонабарашта массахана хьалхадаха деза, малаш ба ца ховча, тешаме ца хетача нахаца бувзаме бувла, цар дувцачунга ладувгӏа йиш йоацилга. Доккхий зуламаш доаржадечар шоай бӏеха болх дукхагӏча даькъе интернета оагӏонашка гӏолла дӏакхухь, шоашта могар ду цар, вахарера гӏулакхаш довза кхенза болча къонабарий сакхетам кегабе гӏерташ. Цунга хьежжа хьехархоша даиман дӏадувца деза берашка; лоралуш, фийла хила дезилга, моллагӏа тешаме доаца хӏама теркалдича, ӏалаьмате чехка ӏаьдалга хоам бе безилга. Цул совгӏа, моллагӏа дола зулам РФ бокъонах бехктокхаме озаш долга кхетадеш хила беза къонабараш», - «Сердалога» из хоам бир мехкарча тохкама комитета болхлочо.
Кхетаче йистейоалаш, хьехархошта белгалдир; дешархочун оамалаш, цӏаьхха, хувцаенна; тешаме ца хеташ хӏама хуле, из тахка дезилга. Дешара шу чакхдаллалца ӏаьдала болхлоша, хьехархоша цхьана дӏабахьа беза лоархӏаме, боккха болх ба из.
