Хи чу лоравалар мишта хила деза, берашта хьехаш ба МЧС болхлой
Шолжа-Шахьарерча бассейне, «Наьк де ӏомале» яха хӏара шерара болам ба дӏахьош. Хи чу лораде дезараш малагӏаш да берашта ховргдолаш, дӏахьош болх ба из тахан. Россе МЧС из болх берригача мехка дӏахьош латта массехк шу да. Боккха пайда беш йолча цу хьехама юкъе дакъа лоацаш хилар Дзовранаькъан Бейӏаьлий цӏерах йолча ДЮСШ 9 шергара 14 шерга кхаччалца бола спортсменаш.
«Эрше» яхача МЧС тоабан болхлой, паччахьалкхен инспектораш бар из болх дӏахьош хиннараш. Лораш тӏакхачале деш дола новкъостал мишта хила деза хьалхадаьккхар цар берашта, шоаш дӏахьокхаш. Ахкан ха хьаэттача, хи тӏа уха денош дӏадоладелча, чӏоагӏа лоралуш хила безилгах дийцар берашка», - аьлар «Сердалога» МЧС болхлоша.
Бераш наьк де ӏомадар, хих лорабала безилга хьалхадахар чӏоагӏа лоархӏаме болх лоархӏ МЧС. Лувчаш бола ха хьаэтта из йистеяллалца; МЧС, ГИМС инспектораша дӏахьош болх ба из.
