МКЖР болхлоша «Советски халкъ. Коталон мах» яха лекци йийшар
Гӏалгӏай къам мехкахдаккхарах болча дагалоаттама Мемориала комплексе, Наьсарен №6 йолча ишкола дешархоша «Советски халкъ. Коталон мах» яха чулоацам бола лекци йийшар. Цун керттера маӏан дар Сийлахь-боккхача Даьймехка тӏема истори ӏомадар, иштта советски халкъо машарера вахар гаргадоаладеш хьийга къа довзийтар.
«Ший мехка истори довзар, вай даьшта карагӏдаьннар мел лоархӏаме да хар - из да боккъонца Даьхе езаш бола нах хьалкхебар», - аьлар «Сердало» газетага из кхетаче вӏашагӏъеллараша.
Лекци дӏахьош, дешархошта дийцар дукхача къамех латтача халкъа цхьоагӏонах, Коталон кӏийле хинна из дӏа оттарах, цар тӏема тӏа, тыле доккха дакъалацарах.
Дешархой дика дакъалоацаш хилар исторический дагалоаттам лорабара къамаьл дӏахьош. Царех хӏаранена довзийтар, Сийлахь Боккха тӏом- из боккха къахьегам, денал, миллионаш бола нах боабар долга.
