«Вай бакъдар» яха урок дӏайихьар дешархошца МКЖР болхлоша
Мехкахбаьхача наьха Мемориальни моттига болхлоша «Вай бакъдар» яха урок дӏайихьар, Ачалкхерча № 14 йолча ишкола дешархошца. Вай мехка истореца дувзаденнараш берашта ма дарра дӏадовзийташ, тӏема операцена юкъе болча вай бӏухоша гойтача майралах, турпалалах дувцаш, Даьхен хӏама лорадар массахана лоархӏаме, бехктокхаме декхар долга белгалдеш, урок хилар цох.
«Россе Турпалаш хиннача СВО доакъашхой сурташ гойтар берашта. Кхувш латтарашта хьалхадаьккхар деналах, майралах бизза бола къонгаш кхебарца, вай мохк массахана цӏихеза хиннилга», - дийцар «Сердалога» музеера урок дӏахьош хиннараша.
Дӏаяхача ханашка Даьхе лораеш яхь йолаш лаьттараш, иштта таханарча деношка боккхача мехка хӏама хьаллаца арабаьннараш бовзийташ, цар истори доаржадеш моттиг яр из.
Даьхенцара безам, лерхӏам чӏоагӏбарах йола урокаш къонабарашца дӏакхахьар тахан чӏоагӏа лоархӏаме да. Цу оагӏонцара болх дикка шербеш дӏабахьа лерхӏ мехка музея болхлоша.
