Гӏалгӏайче гӏолла йолча СК болхоша кадеташца, дешархошца вӏашагӏкхетар дӏадихьар
Гӏалгӏайчен тохкамхоша кхетаче дӏайихьар кхувш доагӏача ноахалашца, криминалистика хьакхелла Ди долаш. Россе Тохкама комитета лоархӏамеча даькъа болхлой цӏай хӏара шера ардара бетта, 19-ча дийнахьа дезду. Цунца дувзаденна, республикерча тохкамхой викалаш бахар СК кадетий класса, иштта Гӏажарий-Юртарча №3 йолча ишкола дешархой болча.
«Кхетаче йолаш, цу боахама болхлоша гойтар берашта, шоаш балха тӏа лелаеш дола криминалистически гӏирсаш. Уж накъадоалаш да моллагӏа цӏимхара хьал эттача моттиге хиннар фуд хара, лар яккхара, тешалаш лахара.
Дешархошта дайзар уж гӏирсаш, цар фу ду хайра, уж уголовни гӏулакх тохкача хана мишта накъадоал хьежар.
Къаьстта бераша терко тӏаяхийтар цар криминалистий къахьегама, цу балха отташ хилча дӏадехараш фуд хайра»,- аьлар «Сердало» газетага Гӏалгӏайчен Тохкама комитете.
Кхетаче чакхйоалаш, хьехамаш дир, кхувш йоагӏа тӏехье нийсача наькъ тӏа йоаккхаш дола хаттараш дийцар, дешара даькъ тӏа хьинар долаш, моллагӏа халонаш тӏехьаюташ уж хилар ловш дола ловцаш даьхар.
Хьаьшаша белгалдир; тахан дӏаелла дешара лард, кхоана накъайоалаш хургья, аьнна. Иштта цар аьлар, Россе Тохкама комитета наӏараш даим хьайийлла хургья шоай гӏулакх дика леладеш болча кагирхошта. Цунца цхьана белгалдир, таханара дешархой, массехк шу даьнначул тӏехьагӏа шоаш мо бӏарчча бокъонаш йола болхлой хилар ловлга.
