МагӀалбика кхале дӀайихьар «Хьалхарчар болама» викалашцара кхетаче
МагӀалбика кхален администраце кулгалхочо Къоастой Ӏаддал-Хьамида балха кхетаче дӀайихьар «Хьалхарчар болам» яхача берий, кагирхой Ерригроссийски цхьанкхетара викалашца. Кхетаче лаьрхӀа яр кагирхой политика доал деча даькъ тӀа дегӀайоалаяра, керттера хаттараш дувцара. Цига дакъа лоацаш хилар МагӀалбика кхале, «Хьалхарчар болама» болх вӏашагӏболлара керттера говзанча Барханой Фатима, иштта моттигерча даькъа викал Гӏулой Мухьмад.
«Кхетаче дӀахьош, цар дийцар 2026 шера де лерхӀачох, иштта цу бӀарчча шера шоайла бувзам лелабарах, цхьана кхетаченаш дӀакхахьарах. Къаьстта теркам тӀабахийтар, болх нийса лелабеча кхела чубоагӀарашка хьажара, болх дикагӀа тоабара, иштта кхален юкъарлон вахаре дукхагӀа кагирхой юкъеозара», - аьлар «Сердало» газетага МагӀалбика кхален администраце.
Къоастой Ӏаддал-Хьамида белгалдир кагирхошца болх дӀабахьар лоархӀаме хилар, болама массайолча оагӀорахьара новкъостал де дезаш хилар. Цо иштта аьлар, «Хьалхарчар болам» - из Магӏалбикера бераш, кагирхой дика дегӀаахара хьакхоллаш дола хьалаш да.
