Гӏалгӏайчен Парламента Кхело хьатӏайоагӏача сессе дувца лаьрхӏар белгалдир
Гӏалгӏайчен Парламенте, спикера Гаьгенаькъан Руслана кулгал а деш, Халкъа Гуллама кхетаче дӏайихьар, цига дийцар хьатӏайоагӏача сессе дувца деза хаттараш малагӏаш да. Керттера дош белгалдеш дакъа лоацаш хилар Кулгалхочун Администраце, Паччахьалкхен викалаш, прокуратуран болхлой, ерригача парламента оагӏоний кулгалхой, яхаш, дийцар «Сердало» газетага парламента зарбан болх лелабераша.
Цига дийца керттера хаттар дар 2027 шера, иштта 2028, 2029 шерашка хила еза республикански бюджет». Керттера республикан ахчан каьхат довзийтар вице-спикера; бюджетах, йоалах йолча комитета викала Дебаранаькъан Мухьмад-Сале. Цо белгалдир, паччахьалкхен программашка хьежжа, еррига исполнительски ӏаьдала балхаш чу а лоацаш, из бюджет вӏашагӏъелла хилар. 2027 шера республико дӏахо дӏахьоргба, хьалхагӏа дӏахьош хинна бюджета, йоала политикан керттера болх. Из бюджета проект къоастаергья лайчилла бетта, 17-ча дийнахьа ладувгӏара болх дӏахьош, цул тӏехьагӏа лаьрххӏа дола каьхат юкъедоаккхаргда сессе дувцаргдолаш.
Халкъа Гуллама кулгалхочо Гаьгенаькъан Руслана гулбеннарий терко тӏаяхийтар из болх лоархӏаме хилара, цо аьлар, керттера ахчан каьхат дика къоастадаро, тӏехьа тӏадоагӏача шерашка Гӏалгӏайче дегӏаяра хьал тоадергда, цудухьа хӏара депутата цу деша лаьрххӏа терко е еза.
Бюджет ювцарал совгӏа депутаташа техкар федеральни законаш хьакхоллара могадераш. Цу хаттарех йолча комитета кулгалхочун гӏончас Мутаӏаланаькъан Ӏумара царех лоархӏамедараш белгалдир. Царца дар, цаӏ йолча культуран даькъ тӏара, госуслуги яха лоархӏаме оагӏув юкъеяккхар, культуран тӏехьален моттигаш эцара арендатарий бокъо чӏоагӏъяр. Цунца цхьана депутаташ дийцар РФ Бюджета кодекса юкъе хувцамаш дахарах, нагахьа санна бераш дола кхалнах, ханал хьалха балха арабоалаш хуле, берашта луш дола ахчаш лорадарах, иштта лаьрххӏача тӏема операце бӏухошта къахьегама таронаш хьакхолларах.
Дийцача хаттарашта юкъе дар республикан лоархӏаме законаш хьакхоллар. Уж да музея ганза хьал леладар; бераш, дезал лорабар; корта бохабу малар юкъера дӏадаккхар, моттигера доал дара ӏаьдал вӏашагӏдоллар, лаьттан хаттараш къоастадар.
