Тӏой-Юртарча ишкола кулгалхочун гӏонча белгалйир тӏехдика къахьегарах
Тӏой-Юртарча № 3 йолча ишкола кулгалхочун гӏонча грамотаца балгалйир, ший болх лакхача боараме дӏабахьарах. Наджгоанцхой беттацарча «Укх беттара гӏонча» яхача оагӏонца котало яьккхар Цхьорой Заремас.
Наджгоанцхой бутт къаьстта дика къахьегаш дӏабихьар цо. Массехк тайпара кхетаче йоаржаеш, берий Даьхенцара безам чӏоагӏбара тӏехьа къахьегаш лаьттар из. Артиста Ди дездеча дийнахьа Къаман артист вола Эсамарзанаькъан ӏалаудин вийхар цо ишколе классера кхетаче дӏахьош, иштта цо бийха зӏамагӏа бола дешархой болча баьхка хилар ОГИБДД болхлой.
«Интернет йоаца Ди» яхача кхетаче Аьрзелгий ловзаре дакъа лоацаш хилар дешархой. «Къаман турпалаш: Сталинград лораяьраш» яха кхетаче, «Йоккхача коталон истори: Ленинград фашистех мукъаяьккха ди» яха лекци дӏайихьар цо берашца.
Тӏема шерашка вай бӏухоша гойтача майралах, деналах дийцар цо къонача тӏехьенна. Ший декхараш дизза кхоачашдеш, боаггӏача боараме балхацара лерхӏам лорабеш, къахьегарах баркал оалаш дола каьхат делар Тӏой-Юртарча № 3 йолча ишкола хьехархочунна.
