Мехкарча МЧС болхлой моллагӏча хӏаманга кийча ба тахан
Мехкарча МЧС, моллагӏа хатар хиннача гӏо деш йолча моттигий болхлой массадолча хӏаман кийчо еш ба тахан. «Сердалога» из хоам бир хатар хиннача гӏо дара болх беча оагӏон кулгалхочо Овшанаькъан Руслана.
Ца соцаш, догӏаш делхарах моллагӏча хатара духьала кийча хургболаш дӏахьош болх ба из. Цхьацца йолча моттигашка айденна хий наьха ковнашка, цӏеношка чудалар, лоаман моттигашка лакхера лаьтта ӏотакхар кхерам болаш да.
Хила тарлуш дола хатар ма хулла дӏа-хьа ца даржийтара тӏехьа къахьегаш ба тахан, беррига низ ураоттабаь. Мехкарча цхьайолча моттигашка хий урамашка, ковнашка чудаьннад, иштта дале а, МЧС болхлоша белгалдечох, хий бердашкара арадаьнна моттиг яц карарча хана.
Сов дукха лаьттача догӏаех хьаӏайна хий Илдарха-Гӏалий тӏарча 15 цӏагӏа, 27 наьха коа, доазонашка чудаьннад. Эбарг-Юртарча Шефски оалача ураме 22 цӏагӏа чудаьннад хий.
Шолжа-Шахьарерча ӏам чура хий боарамал лакхагӏа айденнад, гонахьарча моттигашта зе хилар кхерам болаш да из.
Хига хьожача тоабаша хӏара сахьата бусташ ба из боарам. Тахан ши сахьат даьннача хана Шолж айдалар 285 см латт, Эса -170 см.
Даьла къахетамца, сага хӏама даь хатар дац мехка, наха хинна зе тохкаш ба мехка. 24 сахьата терко лоаттаеш, цу оагӏонцара беррига болхлой моллагӏа хатар эккхе кийча болаш хьал да карарча хана республике.
