Гӏалгӏайчен оарцагIъухараш экзамен дӏалуш ба Россе МЧСа пхе даькъах латтача яхье
Къилбаседа Хӏирийче я республикашта юкъера, Россе МЧСа кӏалхарбахара пхе даькъах йола балхаца ювзаенна аварийно-кӏалхарваккхара тоабай яхьаш. Цу яхьо дукха ха я ше халагӏчарех цаI хилар хьагойта, бакъда мехка эггара лоархӏаш ярех а я из. Ший низага хьожаргья цига Гӏалгӏайчен лахара- кӏалхарваккхара тоаба а, из цу яхьашка даим дакъа лоацаш хул.
Гӏалгӏайче гӏолла йолча Россе МЧСа Керттерча урхаллене «Сердало» газетага ма аллара, цу яхьай керттердар да, халача хьун ӏалама даькъ тӏа болх бар. Цо таро лу лаьрххӏа йола экзамен дӏаяла, шоайла тоабашца цар мишта болх бу ха, нах кӏалхарбахара, шоаш лорабалара хьалаш мишта леладу ха.
Цу яхьашка чудоагӏаш, тоабаш гойта езаш я хьун моттигашка шоашта лела ховш хилар, пхеннел кӏезигагӏа йоаца тӏахьожам беш йола моттигаш лохаргья. Программа чудоагӏаш да 40-гара, 100 метрага кхаччалца лакхача лоам тӏа балар, цига лозаваь саг кулгашца кӏалхарваккхар, иштта хена тӏа вилла из хил дехьаваккхар.
Цул совгӏа, кӏалхарбоахараша чоалхане технически балхаш дергда. Цу балха чаккхе ховш хургья шин даькъа йийкъа яхьаш дӏахьош, дикагӏа йолча тоабай цӏерашйоахаргья турнир чакхйоалаш.
