Мехкарча шин кхален моттигашка дӏадийнача ялатага хьежар цу оагӏонцара болхлой
17.04.2026 15:07
Магӏалбика, Шолжа кхалений моттигашка дӏадийнача ялата хьал мишта латт хьажа арабаьлар цу оагӏонцара болхлой. Из хоам «Сердалога» бир Минсельхозе.
«Тохкама болх дӏабихьар «Даби-Юрт», «Содружество», «Зори Кавказа», «Алханчуртское» яхача юртбоахама лаьтташ тӏа. 6,9 эзар га доазонга хьежар уж (дӏадийнар - 3,8 эзар га).
Лазар дий хьожаш тохкам бир 3,1 эзар га моттига, зе деш дола дийнаташ дий хьожаш техкар 3,8 эзар га», - йоах тхога бенача хоамо. Из болх дӏахьош баьхкараша белгалдечох, эггара боккхагӏа бола кхерам дехкий даржарца ба.
Гектара тӏа 15,3 дехкий къоргаш я. 0,2 эзар га йолча доазон тӏа молхашца царна духьалара болх чакхбаьккхаб. Лаьтташ дӏадийнарашка хьалххе хоам баьб цу кхерамах.
