Россе театральни кхоллама ганза юкъеяхар, вай мехкарча ТЮЗа спектакль
Россе толашагӏа йолча спектаклашта юкъеяхар мехкарча Берий театра спектакль «Дегаза боабашка кӏориг». Из хоам «Сердалога» бир культурахи туризмахи йолча Министерстве. Дошоча ганза юкъе вай театра спектакль яхар актёраша шоай болх тӏехдика кхоачашбаьлга да.
«Россе театрашка къахьегарий 150 шу дизара Ден хетаяь яр 100 толашагӏа йола спектакль белгалъеш йола проект. Эггара толашагӏа дола балхаш хьаллоацаш, доаржадеш я из проект. Спектаклаш харжара болх геттара чӏоагӏа тӏахьожам беш чакхбаьккхаб», - дийцар тха газетага.
«Дегаза боабашка кӏориг» массанена гуш хургйолаш, саькура бетта хьалхарча деношка ТЮЗе болх дӏаболабергба «Триколор» оператора. Цу спектакла телеверси «Йоккха эфир» яхача телеканале гӏолла, «Триколор Кино ТВ» онлайн-кинотеатре хьокхаргья».
Вӏалла гӏалгӏай мехка хьабахка ца безаш, Россе моллагӏча миӏинге цу спектаклага хьажа аьттув хургба мехкахой. Андерсен Г. Х. язбаьча фаьлгах вӏашагӏъелла спектакль массанена дӏайовзаргья укх наькъа.
Белгалде деза, «Дегаза боабашка кӏориг» театрай балха дошоча ганза юкъеяхар ТЮЗа къахьегамхоша шоай гӏулакх боаггӏача боараме дӏахьолга да.
