УФНС кулгалхошца рузкъан оагӏонцарча проектах дийцар Парламента кулгалхочо
Республикерча Федеральни йоалацарча балха Оагӏон кулгалхочунца кхетаче дӏахьош хилар, мехкарча Халкъа Гуллама керте латта Гаьгенаькъан Руслан. Иштта цу вӏашагӏкхетаре дакъа лоацаш бар Парламента вице-спикер Дебаранаькъан Мухьмад-Сали, бокъоний оагӏонцарча аппарата хьалха латта Гаьгенаькъан Башир, мехкарча УФНС аналитически оалача моттига кулгалду Опенаькъан Мухьмад.
«Сердалога» кхаьчача хоамах, гулбеннараша дийцар 2027-ча шерарча, 2028-ча, 2029-ча шерашкарча республикан рузкъан бокъонах йолча проектах. Лайчилла бетта 17-ча дийнахьа дӏаяхьа лерхӏача Халкъа Гуллама кхетачен тӏатайжа болх бар тахан боаржабаьр.
Кхетаче гулбеннараша дийцар экономикаца, иштта йоалацарча гӏулакхаца къайлагӏа дӏакхухьача балхах, тӏалаттача цу оагӏанцарча декхарех. Цига белгалдир, бизнесацара хӏама бокъонца къоастадаьча тайпара хилийтара тӏехьа къахьега дезилга, иштта йоал хьагулъяр лоархӏамеча декхарех долга.
Халкъа Гуллама спикер волча Дебаранаькъан Мухьмад-Сале теркалдир, цу оагӏонцара болх лакха терко еш, тӏатеӏӏа дӏабахьа безилга. Къаьстта дийцар гулбеннача хьакимаша хӏама йохкача моттигашка контрольно-кассови гӏирсаш оттадарах, коммерчески моттигий хӏама йоалах болча оагӏонца чӏоагӏдаь хила дезилгах. Республикерча УФНС оагӏон хьалха латтача Опенаькъан Мухьмада белгалдир, мехкарча хӏама йохкача моттигашка кассови гӏирсаш увттадара болх тӏехьарча хана дикка тоабеннилга, иштта цу оагӏонцара кхоачамбоацараш а хьадоаладир цо.
Кхетаче соцам бир, цу оагӏонцара болх моттигаша, шоайла бувзам болаш, хӏама ма хулла тоадара тӏехьа дикка къахьегаш дӏабахьа безилга.
