Гуштингири яхьашка дунен вице-чемпион хилар вай мехкарча спортсменах Пхьилекъонгий Султанах
Таджикистана столице укх деношка дӏайихьача гуштингири дунен чемпионате дото майдилг йоаккхаш белгалваьлар вай спортсмен Пхьилекъонгий Султан. 65 кийлах долча дозалле дикка низ гойтар вай мехкахочо. Цу йоккхача турнире дакъа лоацаш бар дунен 70 мехкашкара 200 гаргга спортсменаш. Из хоам «Сердалога» бера регионерча Минспортера.
Гӏалгӏай спортсмена цу лоархӏамеча турнире дикка аьттув баьлар ала йиш йолаш да тахан. Душанбе дӏахьоча яхьашта хьакъоастадаь хинна ахча 400 эзар доллар дар, хьалхарча моттига – 20 эзар доллар, борза майдилг яьккхачун - 5 эзар доллар, хӏаьта Пхьилекъонгий Султана дото майдилг яккхарах 10 эзар доллар ахча хьаийцар.
Белгалде деза, вай спортсмен дикка кийчо яь хиннилга, цунга хьежжа толамга кхачар а хилар. Пхьилекъонгий-Юртарча Берий - кагирхой спортивни ишколе кийчо еш хул из Султиганаькъан Мухьмад тренер волаш. Дунен йоккхача яхьашка котало яккхарца даькъала вувц тахан спортсмен, иштта цун тренер а.
