Харцахьарча хьехамашта духьаллатта ӏомабу вай мехкара студенташ
Терроризм, экстремизм яхача доккхача зулама духьалара кхетаче дӏахьош хилар Чуранаькъан Х.Т. цӏерах йолча Къилбаседа Кавказерча доагора-энергетически колледже. Тахан вахаре нийслуш долча харцдарашта духьаллаттар, воча, бӏехача хӏаманна никъ хоадабар мишта хила деза хьалхадаьккхар студенташта.
Магӏалбикерча администраце болхлой, дийша нах, ӏаьдала болхлой бар цига гулбенна хиннараш. «Магӏалбикерча администраце АТК оагӏон хьалха латта Джамболатанаькъан Мухьмад, Цӏечой Руслан, дийша саг вола Беканаькъан Акромат бар къонабарашца къамаьл даьраш. Тахан интернета оагӏонашка гӏолла къаьстта къона тӏехье цу зулама юкъе чуоза, нах тувлбе гӏертарашка цхьаккха тайпара ладувгӏа йиш йоацилга, моллагӏа тешаме доаца хӏама ходелча ӏаьдала болхлошка ӏалаьмате чехка хоам бе бзилга белгалдир кхетаче.
Студентий тайп-тайпарча хаттарашта жоп луш, дӏайихьар кхетаче», - дийцар «Сердалога» кхален администраце. Кхетачен хьалхаэттараша белгалдир, из болх массане хьаллоацаш, дикка боаржабеш бе безилга.
Эггара хьалха цӏенъюкъе хила беза нийсача хӏаманна тӏахьехаш бола хьехам, тӏаккха дешара моттигашка хьехархоша хьалхадаха деза, воча хӏаманна тӏехьаваьнна дӏаваха саг ший ираз доадаьрех волга. Зулама никъ юххьанца хоадабе беза!
