Магасера студенташ юкъарча балха юкъеоз
Магасерча архитектура, шахьара дизайна колледжа студенташ юкъарча балхаца гӏулакх лоаттадара тӏахьех мехкарча кагирхой гӏулакхех йолча комитето. Укх деношка студенташца кхетаче дӏахьош хилар хьинардараш.
«Сердалога» из хоам бир КДМ зарбан болх лелабеча Гӏулой Мадинас. «Студенташца къамаьл дӏахьош бар терроризм яхача зулама духьала къовсам лоаттабеча кхела керттера болхло Авсажанаькъан Мухьмад, гӏо деш леларий моттига (РЦД) кулгалхочун гӏонча Ӏарчакханаькъан Саӏид.
Таханарча вахаре гӏо деш лелараша малагӏа моттиг дӏалоац дийцар гулбеннараша, белгалдир, духхьал бовзарашта, гаргарчарна гӏо деш хиларал совгӏа, къонабарашта юкъе воча, зуламе долча гӏулакхашта духьале лоаттаяр доаржаде дезилга, нийсача наькъа уж тӏахьехаш. Авсажанаькъан Мухьмада теркалдир из лоархӏаме болх болга тахан. Доакъашхошка дийцар йоккхача Ерригача Россе кхетаченах, сахьаташ дӏаяздаь дола гӏо деш леларий книжкаш хьаэцара гӏулакхах», - йоах тхога бенача хоамо.
Юкъара оагӏонцарча доакъашхоша республикерча гӏо деш леларий тоабашта юкъе хилара, из гӏулакх дикка хьаллацара тӏахьийхар къонабараш, хӏана аьлча, гӏо деш хиларо гонахьара дуне дикача оагӏорахьа хувц, ше санна Даьла духьа новкъостал де кийча бараш а корабоагӏа.
