ИнгГУ студенташ котбаьлар физиологех дӏахьош хиннача Ерригроссийски олимпиаде
«Дошо оаса» яхача тоабо дика гойтар Гӏалгӏай паччахьалкхен университет Vӏ Ерригроссийски физиологех йолча 2026 шерарча халкъашта юкъерча «Сага матрица» яхача студентий олимпиаде.
Махачкале дӏахьош хинна хьаькъале яхьаш хетаяь яр лоархӏамеча моттигашта - Россе халкъа цхьоагӏон Шера, эггара хьалха саг космосе ваха 65 шу дузача Денна.
«Тха тоабанна чубоагӏаш шоай программа гойтар Гаьгенаькъан Аминас (капитан), Мержой Ясминас, Овшанаькъан Хьавас, Исмейланаькъан Ювсапа. Цар гойтар шоай барт, хьаькъал хилар, тоаба дика вӏашагӏъелла хилар, цар яьккхар шоллагӏа моттиг. Из дика толам ба, Россера а иштта юхерча кхыча мехкашкара а 23 тоаба цига хиларга диллача», - аьлар «Сердало» газетага ИнгГУ зарбан болх лелабераша.
Белгалду, студенташ кийчбир кафедра кулгалхочо Гаьгенаькъан Долатхана, йоккхагӏа йолча хьехархочо Кхоартой Залинас кулгал деш. Дика новкъостал дир тоабанна ИнгГУ ректора Ӏалбаканаькъан Фатимас, Мединститута кулгалхочо Ӏоахарганаькъан Хьавас.
