1 миллиард совгӏа ахча хьожадаьд, Гӏалгӏайчен наькъаш тоадара
1 миллиард совгӏа ахча хьожадир Гӏалгӏайчен керттера ворхӏ никъ тоабара карарча шера. Республикера наькъаш тоадара хьал дегӏадоаладеш да, «Вахара хьалаш» яхача къаман проекта чудоагӏаш. Из хьаллоац Россе Президента, иштта «Цаӏ йола Росси» яхача парте Халкъа программо. Еррига паччахьалкхен контракташ болх бергболча тоабашца чӏоагӏъяь яьннай.
«Карарча шера тоабергба керттера ворхӏ никъ. Уж хӏара денна республикан бахархошта эшаш йола моттигаш я: «ГОК-Гӏайрбика-Юрт - Соагӏапче», «Магӏалбик-Махьмад-Хитӏе», «Шолже-Гарагорск-Магӏалбик» наькъа доакъош, Магӏалбикера Х. Нурадилова цӏерагӏча урама тӏабода никъ, иштта «Илдарха-Гӏала-Яндаре», «Сурхотӏе-Алхасте».
Керттера терко оаха тӏайохийт кхалений наькъашта, лоаман моттигашта. Йоккха йоацача юрташка никъ дика хилар лоархӏаме да. Къаьстта дешара моттигашта, унахцӏенон моттигаш йолча, балха моттигаш йолча тӏабода никъ дика хила беза», - аьлар ший телеграм-канале Гӏалгӏайчен кулгалхочо Келматанаькъан Махьмуд-ӏаьлас.
Мехка Кулгалхочо баркал аьлар Гӏалгӏайчен машиний наькъий Министерствонна, наькъашка къахьегача болхлошта, уж шоай балха тӏа бехктокхаме хиларах, республикан транспорта оагӏув дегӏайоалаяра цар лоархӏаме дакъа юкъедахьаш хиларах.
