Артиста Ди дездеча бех бахархой мехкарча берий театро
Артиста Ден лаьрхӏа йоккха кхетаче дӏаяхьа лерхӏ кхоана вай мехкарча берий театро. Кхоллама наьха Ди дездеча дакъа лаца бех цар мехкахой. Театре дуккхача шерашка къахьегачарна лаьрхӏа вӏашагӏъеллар йоккха программа я.
«Театре болх беш бола нах лоархӏаш, цар кхоллам безабеннарашта доккха цӏай да из. Лакха начӏал долча суртанчаша кхелла балхаш, наха эггара дукхагӏа езаеннача спектаклашкара сурташ, иштта кхыдараш да цига хьокха оттадеш.
Театр дезарий цу чура болх ма барра бовза аьттув ба кхоана. Россе театрашка къахьегарий Союза кулгал деча Машков Владимира видеога гӏолла къамаьл дергда цига. Иштта цига гойтаргья «Чипполино» яха массанена дег чу йижа спектакль. Берашта санна, боккхийчарна а дезалургдолаш, дог айдеш цӏай да кхоана хургдар», - дийцар «Сердалога» ТЮЗе болх бераша.
Россе эггара хьала дездеш дола артиста Ди бахархой дегашка дужаш хургда. Театре къахьегаш болча актёрий кхоллам безабеннарашта лаьрхӏа дукха хӏама да цига кийчдаьр. Бахархой тӏаэцаш, шерра йийлла хургья кхоана ТЮЗа наӏараш.
