Магасера «Кванториум» - технопарк толамаш доахаш я
Москве дӏаяхьа лерхӏача физиках, математиках йолча ӏан ишколе дакъа лоацаргдараш кийчбеш я тахан «Кванториум» яха берий технопарк. Из хоам «Сердалога» бера цу моттигера.
«2023-ча шера денз МФТИца физиках йола дешара программаш йоаржаеш къахьегаш я технопарк. Йиъ ишколерча дешархошца уж кичбеш болх дӏахьош ба цига карарча хана», - дийцар тха газетага.
Хӏара шера доаржадеш дола из гӏулакх дӏахьош да Москверча физико-технически институте (НИУ МФТИ), наджгоанцхой бетта 25-ча денгара 31-ча денга кхаччалца. «Росатом» яхача Госкорпораце оагӏоно хьаллоацаш дӏахьош ба из болх цига. Вай мехкара ӏан ишколе дакъа лаьцар Магасерча «Марем» яхача гимназе, Магасерча лицейс, Наьсарерча № 1 йолча лицейс, Магасерча дешара Оагӏон дешархоша. Ялх дийнахьа лекцешка ладийгӏар бераша шоашта тӏадехкараш кхоачашдеш, дӏахо шоай тохкама балхах хьахиннар довзийташ.
«Иштта йолча ӏилман-дешара кхетаченаша хьагойт, цхьаццадараш довза гӏерташ къахьегаш долча берий оагӏув хьаллацар лоархӏаме долга», - дийцар тхога берий технопарка кулгал деча Янданаькъан Салмана.
